Mynydd Preseli

Mae Bryniau neu Fynyddoedd y Preseli yn ardal ucheldirol drawiadol yng ngogledd Sir Benfro. Nid yw’r gornel hardd hon o Barc Cenedlaethol Arfordir Penfro yn denu cymaint o sylw efallai â lleoedd eraill ar hyd y glannau. Tir pori agored sydd ar rannau uchaf y bryniau, gyda phatrwm o gaeau a phentrefi bychain yn amgylchynu’r cyfan yn is i lawr. Mae'r ardal yn frith o safleoedd archaeolegol arwyddocaol, tirffurfiau trawiadol, byd natur cyfoethog a ffordd nodedig o fyw. Dyma ffynhonnell y Cerrig Gleision enwog a ddefnyddiwyd yng Nghôr y Cewri (Stonehenge).